早幾日聽到老公同幾個朋友傾揸車，提到APEX，唔明，但又怕喺老公朋友面前表現無知，於是第二日打電話畀教車老友問個明白。原來APEX係指過彎時，部車與彎內側嘅最接近點，由於人人開車方式唔同，行嘅路線又唔同，於是乎APEX亦都唔同。EarlyAPEX即係APEX喺彎位頂點之前，而MidAPEX即APEX於彎位頂點，LateAPEX即APEX於彎位頂點之後。最需要利用APEX嘅係賽車，LateAPEX可以將彎路拉直，以最高速度及安全性過彎。點解？APEX喺頂點之後可提供最大緩衝區，亦即係安全性最高，出彎時可以提早加油，速度亦相對較快，最後係得到最大半徑，即路亦相對地拉直，速度自然可以更快喇！原來係咁，怪不得老公同班公子少爺咁熟啦，話晒成班都係賽車場常客，大姨媽我就一於繼續扮「無知」，反正我又唔係落場玩，香港揸車更加唔使同人鬥快啦！
文：大姨媽