阿仙奴出晒名青訓厲害,領隊雲格年年都重用新仔打江山,其實無他嘅,皆因兵工廠莫財啫,連雲格日前接受訪問時都呻窮。「我唔係鍾意幼齒,只係冇車仔、曼聯同曼城咁有錢啫!」言下之意,雲格只係焗住用班o靚仔,佢再補充:「如果我有1億鎊擴軍,你估我唔識買好嘢咩?」睇嚟雲格都係無奈到極點,所以先爆呢啲晦氣說話。隊長法比加斯最近又炮轟球會,話踢咁多年一個冠軍獎盃都冇,似乎暗示想離隊。雲格家陣四面楚歌,肯定頭都痕埋咯。