四年冇出廣東大碟的校長譚詠麟，最近佢推出最新大碟，仲咁啱有14歲嘅囝囝曉風做雜誌封面配合宣傳，噚日校長喺尖沙嘴搞新碟記招，其中好友孫耀威、劉美君同車淑梅都有撐場，每個人對住校長第一句說話就係：「你個仔好靚仔！」校長聽到心都甜埋，仲鬼咁受落，笑到見牙唔見眼，之後阿倫自己都忍唔住勁讚曉風讀書叻，又有6呎高，真係高大威猛斯文又靚仔。
送仔出國留學
平時唔想多講個仔，不過今次阿倫對個仔曝光仲笑住話：「大獲好評，靚仔過我係應該，我落重料嘛！不過佢有少少唔開心，因為佢鍾意低調，要心理輔導。唔好搞佢喇！咁搞法要早啲送佢去外國讀書。」俾人話佢有5億留畀曉風，又話想幫佢鋪路入娛樂圈，阿倫堅決否認：「『CX』（打噎聲音）就有，佢冇諗過做呢行，佢讀得書，讀得書大把好工，不過家最好係做太監，捽腳指同埋睇風水。」
寸志偉多女圍
至於老友曾志偉被指有私家新歡，校長好抵死話：「我唔知，佢真係有艷福，我冇阿三，得阿四，一群阿四係幫我作嘢，佢身邊成日有好多異性團團轉，個個都不明來歷，佢最鍾意係扶貧，幫助無依無靠無衫着嘅女仔。」
