白花油王子顏福偉為咗非禮罪單官司，早排上訴到終審法院，可惜被即時駁回，噚日白花油（239）開股東大會，福仔現身主持大局。
佢同華華講，被判罰嗰180小時社會服務令已經完成咗好耐，但家仲keep住幫嗰間機構做義工。
咁又係，福仔不嬲出錢出力參與慈善活動，貢獻社會又何止180小時呢？總之不快事件告一段落，可以專心諗計點樣賣多幾萬支白花油。
粵廠執笠潮 影響生意
藥油係家居傍身必備物品，之但係華華勢估唔到，金融海嘯都會影響呢類防守性咁高嘅生意。福仔話藥油通常喺濕熱地方比較多人用，即係長江以南地域喎，至於北方天氣乾燥，唔係好興用藥油，咁啱遇上廣東省有好多廠房執笠，工人返咗鄉下，白花油銷情多少受影響。
家豬流感肆虐，中招人數激增，福仔話自己除咗喺人多地方戴口罩，亦一向有支白花油傍身，佢仲趁機宣傳旗下產品含有「桉葉油」，主治感冒喎。咁投資者下次炒藥業股，係咪要預埋白花油呢？
李華華
mailto:[email protected]