【綜合英國外電】02年盟主曉域治周四在溫布頓網球賽次圈，以3:0勇挫5號種籽迪樸度，後者亦成為男單迄今被拉下馬的最高種籽球手。女單方面戰果正路，以「1姐」莎芬娜為首的幾名熱門球手俱順利晉級。
李娜力爭為彭帥復仇
近年飽受傷患困擾的曉域治是以6:3、7:5及7:5勝出，他在第2盤把握僅有的「破發」機會贏7:5，成取勝關鍵。他賽後坦言這場勝仗意義重大：「我已很久沒挫世界前5排名球手。我早已為這場比賽作好部署，結果演繹得好。」另外，費達拿於周三以3:0輕取西班牙的加西亞盧比斯後，將於周五進行的第3圈比賽遇上德國球手高舒萊巴。就麥沙贏奧迪斯歷基的首圈比賽，不尋常地吸引超高投注額，惹起「假波」風波，費達拿正色道：「作為球手，我們一直希望為這個體育項目的榮譽而戰。」
女單方面，「1姐」莎芬娜、衞冕的威廉絲及古絲妮索娃都晉級，其中莎芬娜憑凌厲抽擊打敗巴拉圭的妮奧絲，繼續向個人首個大滿貫錦標進發。另外，中國球手在周四命運迥異，19號種籽中國的李娜直落兩盤擊敗白俄羅斯的歌禾蘇娃，將於第3圈硬撼11號種籽波蘭的拉雲絲卡。後者正是在第2圈以2:1（6:2、6:7、9:7）險勝彭帥，且看李娜能否為同胞復仇。
溫布頓周三、四部份戰果
《男單次圈》
（5）迪樸度（阿根廷）0:3曉域治（澳洲）
（2）費達拿（瑞士）3:0加西亞盧比斯（西班牙）
《女單次圈》
（1）莎芬娜（俄羅斯）2:0妮奧絲（巴拉圭）
（3）威廉絲（美國）2:0邦達妮歌（烏克蘭）
（5）古絲妮索娃（俄羅斯）2:0彭美迪雅（法國）
（2）莎蓮娜（美國）2:0歌芙（澳洲）
溫布頓第3圈男單部份秩序
（2）費達拿（瑞士）[1.02倍]vs（27）高舒萊巴（德國）[11倍]
（4）迪祖高域（塞爾維亞）[1.25倍]vs（28）費殊（美國）[3.75倍]
溫布頓第3圈女單部份秩序
（3）莎蓮娜（美國）[1.03倍]vs雲絲（意大利）[10倍]
（4）迪文泰娃（俄羅斯）[1.1倍]vs古莉歌娃（俄羅斯）[6.5倍]
韓迪卓娃（斯洛伐克）[1.36倍]vs杉山愛（日本）[3倍]
註：（）為種籽排名、國籍
賠率來源：立博
《花絮》
費達拿FB有200萬「朋友」
同費達拿「做朋友」有計？社交網站facebook大行其道，可以幫我地搵番失散咗好耐嘅朋友，而作為網球球迷寵兒之一嘅27歲瑞士球手費達拿，亦非常緊貼呢股風氣，上網玩facebook（圖），佢話facebook帶畀佢無限樂趣，仲收到好多fans嘅留言支持，佢話家有成200萬人做咗佢嘅「朋友」呢！
莎蓮娜改行做編劇
莎蓮娜轉行做「才女」？生涯贏得10個大滿貫單打錦標嘅美國球手莎蓮娜，話自己家除咗忙打網球之外，仲幫緊美國電視台嘅電視劇寫劇本，個劇本而家就未寫完，家已經寫咗3部份，劇本嘅題材就話類似《靚太唔易做》、《色慾都市》，莎蓮娜今次係「小試牛刀」，下次仲可能寫電影劇本㖭！
羅達撞親女球僮
溫網出現《危險椅子》？29歲嘅法國球手羅達（右），喺次圈對德國嘅赫斯時，為咗救波成個人撞咗落15歲嘅女球僮艾恩（ErinLorencin、左），一齊撞落張高凳度，令現場10,000名觀眾都驚個小女孩會受傷，點知可怕嘅事情發生咗，受傷嘅原來係羅達，佢左邊臀部受傷要退出比賽，估唔到羅達唔係敗喺赫斯拍下，而係俾張凳擊敗！
