的士行家經常被誤會，最多乘客指摘司機態度有問題，而最常遇到係討厭搭短途嘅客，有啲害群之馬甚至開口鬧客，又或不情不願地邊揸車邊「鬼食泥」。查實早十年好市時，我哋反而鍾意短途客，嗱嗱聲執支旗又嚟過，密密食仲盞。今時今日市道唔好，大部份行家都望每更有兩、三支大旗頂住車租同油錢，有時喺火車站、時代廣場紮咗成粒鐘馬，嚟支唔跳錶嘅客難免失望啲嘅。唉，法例規定無得揀客，載得人又何必搞到大家都唔開心呢？
我有時太夜送衰婆阿鳳返慈雲山，地鐵站無晒小巴，都係惟有搭的士，唔通行上山咩。雖然無跳錶硬倔18蚊，不過仲未遇過畀說話我聽嘅行家，我亦會好識做咁畀夠齊頭20蚊，司機大多會講埋多謝，大家開開心心再各行各路，咁咪好囉。
文：黃師傅