近日睇見奧雲同舒夫真高兩個，似足中環戲院里嘅老擦鞋匠，佢哋為生計都要低頭專心擦擦擦，所唔同係佢哋唔係擦鞋，係想擦番靚以前攞過嘅金球獎（歐洲足球先生獎），希望話畀人知，佢哋仲有料到。可惜命運不可自決，同奧雲仔傾嚟傾去都係弱勢球會，而「軍刀」想投摩納哥嘅願望難達成，前途未卜，等運到。
奧雲只有細球會青睞
紐卡素降落英冠，奧雲同經理人都開晒聲話想跳船，而佢下個禮拜同紐記約滿後就恢復自由身。29歲仔，加埋以前咁威水，單係拎住01年歐足先生獎都夠照，照理大把人吼。偏偏佢早熟早殘，喺球場上嘅表現，同佢29歲嘅實際年齡完全不符，最慘係佢長期受傷困擾，稱佢為玻璃腳都唔過份。正因為咁，繼侯城表示對佢有興趣後，最新消息加入爭奪嘅，只係史篤城。
史篤城主席佩利斯話：「我哋明白奧雲成日傷，但只要佢有份重振雄風嘅決心，對我哋嚟講都會係一個好好嘅收購。」總算多咗人吼，但奧雲點會睇得上眼，是旦投一「城」，結果都係錦標唔使旨意，睇個款又要經歷一個護級球季，衰到降落英冠都唔奇。
軍刀人工高難投摩納哥
04年歐足先生舒夫真高一樣坎坷，車路士由AC米蘭回收佢後，佢會跟番舊老細安察洛堤。睇「肥安」去季都當佢隱形，就知「軍刀」唔慌有前途。以為法甲摩納哥有興趣簽佢，總算係一間法甲傳統名牌，唔算好失禮啦，點知摩納哥教練拿甘比慌死呢枚濕水核彈頭唔夠濕，一盤冷水兜口兜面照頭淋：「簽舒夫真高？唔諗囉。」據講，摩納哥真係對佢有興趣，但「軍刀」人工太高，畀唔起，畀得低咩，又怕佢唔賣力，一個錢字，令呢單轉會難成事。
一個有人吼但難屈就，一個就想轉倉但轉唔成，此路不通。我諗兩個昔日名將最希望眼前已發霉嘅金球獎，變為一個可以預知未來嘅水晶球，至少可以早啲埋班，唔咁使愁都好吖。