世界性飄移賽事FormulaD，下星期喺新加坡舉行，兩位港人代表中國同香港，決戰西方同亞洲國家飄移高手。其中James架700匹Aristo早已採訪過，今日巧遇埋Ray架過境性質嘅火紅戰車，梗要問番兩句，估唔到兩師兄弟飄移揸法都大相逕庭，「James入彎求準繩，我就玩爆炸力，210km/h極速劈咗入彎先講！」
記者：徐影龍
攝影：楊錦文
高手喪改Aristo
㗎仔稱霸飄移界，打得入日本嘅D1入圍賽，已屬高手中嘅高手。不過下星期喺新加坡搞嘅FormulaD，更屬世界性規模賽事，中國同香港唯一有份參賽嘅，只得James同Ray，兩個同樣以喪改Aristo征戰獅城，採訪當日戰車由珠海運嚟香港，再轉船到新加坡，到港只屬過境性質。難得一次過見齊兩架戰車同兩大高手，就算晨咁早9點入到8號貨櫃碼頭都無乜所謂。
James師承日本D1大賽常客織戶學同谷口信輝，飄移技巧爐火純青，彎前速度、入彎角度等力求精準，帶點大師風範。而另一戰友Ray，只喺飄移界玩咗兩、三年，但已參加過日本、中國同馬來西亞唔少賽事，就像嶄露頭角嘅令狐沖。後生仔總帶點火氣，「我揸法同James都幾唔同，佢會用腳掣同扭軚嚟入彎，角度準繩，但我就以重心轉移為主，5波盡油210km/h，先左再急扭右軚入彎，控制得好時間可以快好多。」James補充，「每個人都有唔同揸法，無話啱唔啱，我哋都會互相影響，有時我會學Ray咁多啲用手掣飄移，吸收融會後的確令自己有所進步。」
Tune到人車合一
早前已採訪過James架700匹Aristo，今日集中講吓Ray架火紅凌志，「我架Aristo用咗新款尾期頭燈同鬼面罩，外形上跟James嗰架有啲唔同，但骨子裏一樣做足偷輕同加Turbo提升馬力等重點改裝，當然令到車架軟硬適中嘅點焊都唔少得，另外車身後半無晒座椅等多餘物品，不過太輕又係唔好，所以將較重嘅油缸移去車尾，令到車身平衡得好啲。其實基本上無乜飄移車手會改Lexus架Aristo，我哋家改到得番車殼同底擔用番原裝，九成以上已換過晒，連引擎都專登搵番無VVT-i嘅舊偈嚟裝，每架差不多花成80萬去改，主辦單位都好期望睇到Aristo飄移表現到底如何。」
「我認為改車唔係一味揼錢換Parts，車手最緊要學識架車有乜唔啱自己，再逐啲慢慢改，Tune電腦之餘其實亦要自我Tune一Tune。架車只係改好幾日，好多位仲未算好滿意，希望到新加坡後花啲時間，Tune到人車合一。」
