被譽為「金手指」的高盛前合夥人麥高域（MarkMcGoldrick）「載譽歸來」，打算喺亞洲自立門戶，搞咗一隻以香港加列山命名嘅私募基金MountKellettCapital，暫時籌集到25億美金（195億港銀）。
外電引述消息話，呢隻加列山私募基金總部設於本港，暫時有10名專業投資者坐鎮，覬覦亞洲地區嘅交易，特別係內地同印度。舊年基金最初成立時，打算籌集50億美金，點知一場金融海嘯令規模減半，不過家呢啲時勢，達標一半已經算唔錯。聽講加列山基金一早開始同內地傾刁，規模大約1億美金。
搞基金命名加列山
麥高域呢隻金手指，當年由加拿大帝國商業銀行過檔高盛，05年花紅高達5000萬美金，仲高過當時嘅總裁，06年佢收咗4000萬至7000萬美金嘅花紅，據講佢喺亞洲處理不良資產甚有一手。