中環在線:樓價回升連沽3伙浪澄灣 四太蝕少好多 - 李華華

中環在線:樓價回升連沽3伙浪澄灣 四太蝕少好多 - 李華華

最近樓市生番,賭王何鴻燊三太陳婉珍大手斥資成億銀掃入北角形品逾20伙,仲想再買新蒲崗譽.港灣,但四太梁安琪就落力出貨,喺舊年用咗2.4億買入大角嘴浪澄灣嘅53伙,家陣賣得七七八八,啱啱仲一口氣連沽3伙,蝕幅大大收窄。有經紀話四太見樓市轉旺,家已經唔肯蝕咁多,甚至連經紀佣金都減咗。
舊年爆發金融海嘯,四太浪澄灣批貨蝕賣都冇人吼,但近期樓市勁旺,食正銀行減息搶客,加上四太出貨意欲積極,以低過二手價賣之餘,仲向地產經紀加埋佣促銷,結果過去兩個月已賣出33伙,成個屋苑呢個月有6宗成交,四太就佔咗5間。

夾埋只蝕百零萬

四太出到貨之餘,仲要唔使蝕到攤攤腰,之前賣一間已唔見百幾萬,但啱啱連沽3伙,夾埋都唔使蝕百一萬,蝕幅由15%,降至6%。其中5座高層D室,753方呎,四太以538.3萬元買入,剛以506萬元賣出,唔計使費,只蝕6%,係舊年海嘯以嚟,四太浪澄灣蝕得最少嘅一間。
有經紀話,由於四太浪澄灣批貨賣得七七八八,只剩番十零間,加上家個市咁旺,所以唔急賣,除咗唔肯蝕咁多之外,仲將代理佣金由1.25%,降到1%。睇嚟四太數口都咪話唔精。

李華華
mailto:[email protected]

四太浪澄灣批貨只剩番十零間。