繼破天荒喺冇穿冇爛嘅時候申請自願清盤，獲再私有化機會嘅南太電子（2633）又有新搞作，就係自願每日公佈私有化投票進度。南太大股東兼非執行主席顧明均話，唔好以為佢哋告急先至咁做，其實只係順應股東意見。
顧明均叫華華搵番星期二份通告，雖然驟眼睇個數可能好似唔高，但同上次私有化投票同期嘅贊成票數比，多出咗成倍有多，證明今次反應好好。佢話睇到個數，今次可以成功私有化嘅信心又大咗啲。
顧生仲話，今次經已特登同啲中介人單咗聲，以免再發生上次漏報嘅悲劇。睇番噚日佢哋嘅通告，已回覆並接納私有化嘅百分比，大約去到27.4%，加埋中介人嘅「大飛」，睇嚟今次都應該得喇啩？