節目主持Ｇ小姐與股壇名嘴一行人到廣州做投資騷，坐直通車好快到。上車之前，名嘴Ｗ話不如買雜誌報紙在車上閱讀，打發時間。在書報店，本來一手就想攞《蘋果日報》與《壹週刊》嘅，但名嘴Ｗ驚住內地既然封殺「壹傳媒」，呢兩份可能會被海關充公嘅喎，立即放低，改買《亞洲週刊》與《明報》。點知到咗廣州車站，出關時，關員望到膠袋入面有報紙，立即叫停，一搜之下，關員話《亞洲週刊》與《明報》唔可以入境，立即充公，記者Ｇ本想申辯，名嘴Ｗ話：「算嘞，算嘞，唔好多口。」
中午時分，到達酒樓，與主辦機構吃飯，唉吔，人哋興中午飯飲XO，記者Ｇ飲半杯已經面紅耳熱，唯有搵同行嘅公關/行銷人員擋駕，到兩點半開騷之時，一位sales幾乎步履不穩。內地人酒量驚人兼且鍾意飲，香港人現在興講健康第一，中午點識飲XO吖。
聽投資騷嘅聽眾甚多，聽講如果能言善道，講普通話有梁文道水平嘅話，股壇名嘴去上海、廣州及其他城市巡迴表演，大有市場，搵銀更多。大陸一味勝在人多，市場大到無倫，我哋香港七百萬人無法相比。譬如編劇Ｌ話十五年前上大陸幫手寫電視劇集劇本，佢收八千銀一集，照足香港價錢，順便教一兩個內地徒弟寫劇本，徒弟收三四千蚊一集。今年編劇Ｌ在香港寫劇本，價錢仍然係八千或以下，而內地徒弟話畀佢聽，寫一集可收四萬五千元人民幣，搵錢多過師傅（編劇Ｌ）幾倍，寫完一套劇集可以休息一兩年。
但喺內地拍戲，拍電視劇，要冒好大政策風險，文化宣傳部/廣管局官員不時會下達指令，有中央指令，有地方指令，有長官意志，跟到你暈。編劇Ｌ話有時拍拍吓愛情奇情悲劇，突然收到通知話不鼓勵劇集出現謀殺、打架與哭泣場面，拍咗就要cut，搞到製作方面硬晒軚，已經拍好嘅片集要即時雪藏，都唔知點樣向廣告商贊助商交代。故此一啲上市公司從事呢行生意嘅，如果話有可觀存貨，archive值錢喎，唔該大家問真啲，呢啲archive係唔係「無期上映」嘅被禁電影或劇集？如果係嘅話，要大幅度撥備㗎。