台資旺旺老闆蔡衍明入股亞視，節目口味有變，播出《康熙來了》等台式綜藝騷，連員工口味都想調整，八方聽聞亞視canteen近日引入旺旺產品，大賣仙貝、小小酥、黑白配，而新卡片亦加印旺仔logo，內內外外體現旺仔精神。
旺旺標榜用心賣米餅，做電視亦然，代表新老闆嘅行政總裁胡競英噚日開記者會，強調亞視唔會再大裁員，之前炒人因為擔子重，「無能力養咁多人」，家視員工如家人，已請番唔少被裁職員回來做短期工，咁樣對待「家人」，佢解釋「容易啲控制成本。」
希望三年後轉虧為盈
廣管局上星期就兩個免費電視台牌照中期檢討辦公聽會，胡競英都有出席，佢話聽到觀眾提出咁多意見畀亞視勁感動，反映市民仍然對亞視充滿期盼，為免令fans失望，佢噚日誓言亞視下半年會重新出發，保持新聞及娛樂兩大強項之餘，仲會新增一條數碼頻道，又會發掘本地藝員、歌星同幕後人員，攝製激勵人心劇集、製作遊戲節目，總之「做香港人的電視台。」
積弱多年嘅亞視，久唔久都帶來驚喜，《包青天》、《今日睇真D》傳頌至今，近期諷刺時弊嘅扮嘢節目《香港亂噏》口碑不俗，據講最高收視有七點，胡競英透露會食住上，由只在周日播出增至星期一至五天天出街。
胡競英做過明星，最為人熟悉嘅係同譚校長合演《假如我是真的》，佢滿肚大計搞起亞視，八方相信不會是假的，而一齊開記者會嘅亞視主席張永霖，外界初時以為佢只係過渡人物，但佢話暫時無意抽身，又指亞視目前財政及人事穩定，努力開源節流後雖然未賺錢，但已經蝕少近半，「希望兩、三年後可轉虧為盈，然後上市。」
咦，咁講法好面善喎，由麗的時代開始，不論係港資或台資，潮州人定係內地大款，邱德根、已故林伯、封小平、陳永棋、查懋聲等，亞視每個新老闆上場時都揚言一年回本兩年賺錢，第三年就食大茶飯，結果卻係捱得一年得一年，大結局係人都知，只係唔知胡競英要捱幾耐啫！
mailto:[email protected]