7.1活動多籮籮，多個大大細細團體舉辦活動上街，煲呔當日都走出禮賓府，選擇參加愛國愛港大巡遊，真人上演「河蟹騷」。
玩低姿態唔傾政治
其他是非人物則疑似着草，民建聯葉國謙03年7.1時係眾矢之的，今年7.1佢決定遠離是非地，連巡遊都唔參加，月底29號帶領民建聯訪問團去台灣，避鋒頭直至7月2號先返香港，阿謙強調唔係要避開7.1，只係因應立法會工作安排。
蠱惑仔着草唔係去遊埠，所以行事一定要好低調切勿張揚，民建聯呢趟訪台亦十分低姿態，強調只談文化、環保，絕對唔傾政治，亦唔會安排會見政府高官。今次行程由中華旅行社包辦，據講每位要成4,000幾蚊，同市面旅行社台北四日三夜團比較，明顯貴一截，難怪阿謙都不禁呻似乎貴咗啲，為免外訪搞到山窮水盡，佢透露擬成立「外訪基金」資助黨友出外開眼界，稍後會辦舞台劇籌款晚會。