基斯坦奴朗拿度（C朗）將以破世界紀錄嘅8,000萬鎊（約10億港元）轉會費加盟皇馬，但西班牙國民除咗認為物非所值外，連國內一間名為納瓦拉大學調查都指出，巴塞嘅美斯喺人氣方面勝過C朗。兩位全球最勁嘅球星未喺西甲新球季碰頭，美斯已先贏準備踩場嘅C朗一仗，呢份仲唔係美斯嘅最佳生日禮物？
美斯巴塞齊大勝
噚日24號係美斯22歲生日，正喺家鄉阿根廷度假嘅佢，堪稱最紅壽星。據西班牙納瓦拉大學嘅體育與無形數據（ESI）團體研究指出，08/09球季表現最佳、最有作用兼最具人氣嘅球員比較中，美斯以21.9分居首，較21分嘅C朗高出0.9分。
研究指數係綜合上季全歐洲球會嘅成績，以及過去3季逾300名球員嘅轉會價值等計算出嚟；雖然調查只係嚟自一間西班牙大學，但計分方法超嚴謹，美斯要擊敗C朗一啲都唔容易㗎！美斯今次贏到，相信同巴塞上年喺歐聯決賽擊敗曼聯好有關係。
我求大俠就八到，皇馬會喺7月3日正式宣佈C朗加盟；早排《馬卡報》先有一項投票顯示，得3成幾人認為C朗值8,000萬鎊。大家都知皇馬同巴塞係世仇，新球季C朗同美斯將會鬥餐懵；家陣美斯先贏「最具人氣獎」，總算一挫對手銳氣。仲有呀，納瓦拉大學為上季「最佳球會」做埋調查，都係巴塞（86.2分）贏曼聯（86分）㗎！鬼叫C朗幫唔到紅魔捧歐聯咩？
球員身價C朗最貴
美斯贏咗兩回合，但喺ESI嘅「球員身價」研究中就輸畀C朗；雖然C朗冇去到8,000萬鎊咁誇，但都以6,950萬鎊成最高身價球員，美斯以6,790萬鎊居次，利物浦嘅費蘭度托利斯就值5,700萬鎊排第3。電腦數據係死嘅，只可以作參考，美斯同C朗邊個勁啲，下季西甲自有分曉。
提提大家，截至6月15號為止，巴塞喺全球嘅會員數目已去到破紀錄嘅163萬人；就睇吓皇馬有C朗同卡卡加盟後，會員人數會唔會創新高。