甄楚倩01年秘密產子，之後淡出娛樂圈專心湊仔，仲成日俾人發現佢同現年8歲嘅囝囝行街街享受親子樂。
囝囝精靈可愛
呢排日日落大雨，不過甄楚倩母子照樣出動。前日下晝4點幾，佢哋去咗中環吉士笠街、以牛雜同炸魚皮聞名嘅明星麪檔水記撐枱腳。當日甄楚倩同囝囝仲着埋母子裝，媽媽着綠色褲，囝囝就着綠色衫。佢哋叫咗兩碗麪同飲品，仲有油菜，夠晒健康。
食物未到，甄楚倩同囝囝傾偈傾得好開心，囝囝表情多多，好鬼精靈；冇化妝嘅甄楚倩冇乜變，不過腰間多咗條士啤胎，睇嚟生活都幾寫意。佢哋食食吓，雨勢越嚟越大，仲滴咗幾滴雨水喺囝囝個頭度，只見囝囝眼仔睩睩摸吓頭頂，兩母子一齊向上望，之後急急調位，甄楚倩仲攞咗張紙巾同囝囝抹乾頭髮，母愛洋溢。之後兩母子食飽走人，仲邊行邊互相提點簷篷滴水，果然母子同心。