土炮卡通人物麥嘜、麥兜走紅多年，特首煲呔噚日去探望佢哋，麥嘜、麥兜兩嚿肉唔使靠政府都快高長大亭亭「肉」立，煲呔都頗為驚訝，事實上麥嘜產品唔止香港賣得，更名揚海內外，內地、台灣、法、韓、泰、日本都有fans，好犀利。
麥嘜今年暑假有新戲上映，煲呔噚日獨家試看，呢套大製作獲電影發展基金資助360萬元，內地都會上映。睇完試片，煲呔轉去智傲互動娛樂集團參觀，呢間公司以開發onlinegame聞名，成立短短八年，業務已拓展至內地、台灣、美國同東南亞多國，網絡遊戲《古龍群俠傳》好受歡迎，煲呔都有試玩遊戲，升呢當然唔及電車男叻啦。