甲型H1N1豬流感肆虐，成班的士行家每日接載過百人，當然嚴陣以待，不過唔係擔心容易被傳染，而係驚市道越做越靜，加上學生又停課，對的士嚟講真係雪上加霜。嘆完飛砂走奶，成班老死嗱嗱臨戴番口罩，繼續開工搏殺。隔籬枱大麻成無動於衷，好心提吓佢，點知佢一輪嘴反擊：「早幾日有個阿嬸上車，一見我戴咗口罩，即時九秒九掩鼻彈番落車！全日有近半客仔都係類似情形，心都淡。小巴載客更多啦，你見唔見到有司機戴吖？」係啫，始終的士空間較細，大家「親密」得多，唔戴口罩接客，咪等於鹹蛋黃北上尋歡唔戴袋一樣，好易瀨嘢啫。戴口罩係一種負責任嘅行為，希望大家唔好戴有色眼鏡截的士喇。
文：黃師傅