18歲生日，沒蛋糕吃，要飢餓慶祝，Seaman不覺掃興：「人生有幾多個18歲？咁樣過，我覺得好有意義喎！」生於7月1日的Seaman響應網民周諾恆發起的7.1絕食71小時行動，打算在剛好踏入成年的大日子，以自己相信最有意義的形式慶祝。
記者：蔡元貴
發起7.1絕食的周諾恆，早前與兩名網民在今年六四前夕，於中聯辦門外絕食64小時，引發傳媒報道及網民關注。25歲的他7.1再出發，在facebook及高登討論區發起7.1絕食71小時。周諾恆在facebook群組「吹雞」後，至今最少有九人表示加入，反應比六四絕食更熱烈。
從事旅遊業的周諾恆，仿效八九學運領袖，發表了一份絕食宣言：「手中握有主子所賜權力的鷹犬怎會在意？如果他們在意人民的訴求，又怎會剝奪我們選舉的人權？在這個非民選政府眼中，我們這些蟻民，即使餓死，又算得了甚麼？」
國家冇民主 人民好坎坷
周諾恆說，絕食目的是呼籲香港人出來爭取民主，或者表達對政府的不滿，「我哋冇統一嘅訴求，總之各人自發，做想做嘅嘢。」
響應號召的7.1之子Seaman是個基督徒：「我覺得神要我呢日出世，係要畀我一個使命。但係亦因為咁，我嘅生日變得有啲唔開心，諗起自己國家雖然經濟進步，但係冇民主，冇尊嚴，覺得中國人命途好坎坷。」不過他說今年會過得比較開心，因為有一群理念一致的網民跟他一起過生日。
時代廣場中途加入遊行
他們計劃在時代廣場絕食，由6月29日至7月2日，中途會加入7.1遊行大隊。表示加入的網民，還有曾經在利東街重建糾紛中被警方剝光豬兼起訴的梁玉熹。「選擇絕食，係因為香港社運方式太過單一，來來去去都係遊行同集會，我哋想表達更大嘅意志同埋決心，希望令到社會有種轉變。亦都希望透過呢種方式，令每個香港人都願意付出多啲，爭取公義。」梁玉熹說。
梁玉熹引用了電影《高凶三萬尺》的一句對白自我表白：「當你失去最寶貴的東西，你願意付出甚麼代價去捍衞？」他解釋，電影中女主角丟失了女兒，尋親過程中被人恥笑她有精神病，但她爭取到底，「嗰種捍衞精神令我好感動，我哋失去咗07、08普選權利，家拖到2017，仲話有篩選機制，我哋又應該付出乜嘢代價去爭取、去捍衞？」
不願做奴才 今年再起來
19歲的梁玉熹近年熱衷公民運動，付出不少。07年加入H15關注組，為保留利東街抗爭，結果與多名示威者被起訴，最終獲判無罪，但當時就讀中七的他被官司煎熬，影響學業，一度離港到台灣升學。
年輕網民平時上網品評港女、粗口爛舌，講起7.1，講起普選，卻又認真嚴肅得很。好像吸過煙、曠過課的Seaman，還會引經據典講民主，「胡適講過，爭你們個人的自由，便是為國家爭自由！爭你們自己的人格，便是為國家爭人格！一個自由民主的國家，不是由一群奴才造成的！」不願做奴才的網民，今年又再起來了。