受次按危機同金融海嘯影響，全球市場由07年底至舊年底大冧市，唔少投資者走避不及，搞到損手爛腳，之不過，英國查理斯王子有先見之明，早喺07年9月已沽清大部份股票，避過一場浩劫。
07年起大手沽股樓
皇室近日公佈查理斯王子嘅年度賬目，顯示喺07年4月至08年3月嘅財政年度內，佢原本揸住2240萬英鎊（約2.9億港銀）股票，之後加碼710萬鎊，然後喺07年9月左右狂沽2620萬鎊股票，剩番330萬鎊股票；呢批股票到年結只值238萬英鎊，蝕咗92萬英鎊。王子發言人話，當時已覺得股票估值會向下，所以先走為上，你話幾咁好彩呢？唔講唔知，原來查理斯王子喺02年亦減持股票，避過當時大跌市。
到今年3月底，王子手持嘅股票總值200萬鎊，按年貶值38萬鎊或16%，遠勝英股嘅30.5%跌幅。
查理斯王子其實亦睇淡英國樓市，喺08年財政年度，賣出6770萬鎊嘅商用物業，避過樓市下滑。佢減持股票同物業後，將資金轉投國債同公司債券，截至今年3月底，一共揸住1880萬鎊嘅定息收入資產，同1940萬鎊海外債券。咁有先見之明，下次記者見到王子，可能要問吓佢投資意見嘞。
李華華
mailto:[email protected]