每個領隊都有自己嘅喜好，就好似利物浦咁，佢哋領隊賓尼迪斯對閘位球員情有獨鍾，唔買過都唔安樂。至於曼城波士曉士就同賓尼迪斯相反，最冧前鋒，但就一定要嚟自南美洲至啱口味，兩人鬥豪鬥儍！？
格連莊臣染「紅」超高薪
24歲嘅格連莊臣禮拜一落實以1,850萬鎊（約2.33億港元）由樸茨茅夫過檔利物浦，仲簽咗份周薪10萬鎊嘅4年合約。查實曼城都同利記爭過，但出手低啲，只係俾周薪8萬鎊。由於樸茅之前幫襯利記買高治仲有700萬鎊未畀，所以利記喺呢單交易可以扣數。但謝拉特同埋費蘭度托利斯呢兩個大哥級球員，周薪都係13萬鎊同埋11萬鎊，至於據報有人工加嘅馬斯真蘭奴，加咗之後都係得6萬鎊咁大把，但格連莊臣未喺歐聯或歐國盃等大賽證明自己都可以個個禮拜10萬鎊，唔影響士氣就假。
咁都未算，賓尼迪斯近年買入嘅閘位球員好似係艾比路亞、菲臘迪根同埋杜辛拿，唔係太貴就係得個朵響，「廢」到爆。格連莊臣雖則係英格蘭國腳，但我求大俠橫睇掂睇，佢點唔值1,850萬鎊同攞10萬鎊周薪囉！連賓尼迪斯都承認買貴咗，但佢話鬼叫格連莊臣係英國仔咩！
泰維斯歸曼城南美幫
賓尼迪斯狂買閘，曉士就狂買南美前鋒。禮拜一曉士用4,000萬鎊（約5億港元）買入巴拉圭辛達告魯斯同埋阿根廷泰維斯，前者簽4年而周薪8萬鎊，後者就5年合約周薪10萬鎊。現年25歲、身價2,550萬鎊嘅泰維斯同曼聯嘅兩年借用期到本月尾，所以要到7月1日先正式加盟。至於辛達告魯斯過咗體測後就嚟咗，如果落場次數達某數目，曼城俾布力般嘅轉會費就由1,500萬鎊加到1,800萬鎊；但呢個27歲嘅靚仔前鋒係出名嘅藥煲，傷親都大大鑊，所以用咁多錢買佢返嚟，我求大俠覺得唔係好抵。
但點到好，辛達告魯斯算係好波，由他夥拍泰維斯同埋巴西羅賓奴，組成南美攻擊鐵三角，確實令人引頸以待。