中華鱘又嚟喇。內地舊年總共送咗10條國寶中華鱘畀海洋公園，冇耐就死咗3條，一條俾海狼咬死，兩條唔適應海化過程客死異鄉，嚇到海洋公園匆匆將生還國寶送返廈門長江水產研究所，事隔多月，主席盛智文噚日透露，今年夏天過後中華鱘就會回流海洋公園，至於是否去年執番條命嗰七條魚，或者有幾多條來港暫時未確定。
新展館模仿長江生態
中華鱘要喺鹹淡水交界水域生活，去年海洋公園試驗用鹹水養搞出命案，日後會改回用淡水養，盛智文否認海化研究失敗，辯稱因為新展館會改名為「中華鱘館─長江足跡」，館內會加入其他長江水產，為模仿長江生態，所以用淡水，內地會繼續研究中華鱘海化過程。
睇嚟海洋公園今次學精咗，唔敢再搵國寶「較飛」，否則國寶再出事，盛智文真係罪無可恕。盛智文出名扮嘢，佢噚日扮原始人，同隻識點頭嘅機械恐龍講嘢，作狀問恐龍：「你可唔可以代表我呀？」機械恐龍儍更更點頭，全場爆笑。