致力援助發展中國家、以撲滅貧窮為己任嘅世界銀行（WorldBankGroup），平時工作離不開向發展中國家提供長期低息或無息貸款，甚至送錢畀佢哋使，貸款基金來自發債，擁有3條A最高評級，全賴成員國支持。不過近日世銀竟能一石擊起千層浪，只因佢發表報告，降低全球今明兩年經濟增長預測，今年萎縮幅度由1.7%大幅調高至2.9%，明年經濟增長率由2.3%下調至2%。
雖然中國和印度今年增長預測仍被分別調高至7.2%及5.1%，但正所謂沙塵滾滾殺錯良民，今次世銀真係搞到全世界股市散咗，真不愧為「世界銀行」，當然股票市場在累積豐厚獲利空間後，好友巴不得有個冠冕堂皇嘅藉口落車。
起起世銀個底，呢個成立於1945年嘅國際組織，現時成員國達186個，屬於第二次世界大戰後世界各國於布賴頓森林會議後嘅兩件產物之一，任務係幫助各國從戰亂中重建及滅貧，使命係提高全球人類生活水平，非常神聖。另一個同日誕生嘅國際組織，就係國際貨幣基金組織（IMF），職責係監察各國貨幣滙率、貿易收支及債務狀況，發揮核數師角色，邊個國家唔掂，就可以由儲備金借錢，不過最多只可以借5年。IMF總裁由歐洲人出任，IMF對全球經濟睇法則相對樂觀，預測全球經濟今年萎縮1.3%，明年則增長2.4%。
兩個國際組織各司其職，只是兩者當年成立之時，組織架構上皆由當年嘅強權美國及英國揸晒Fit，組織背後所代表嘅利益亦然。世銀長期受美國人支配，連總裁都用美國人，過去就有唔少批評針對佢，話佢嘅政策往往只向美國利益傾斜，利用財政操控債仔國，迫佢哋就範，一味推動發展中國家企業私營化，總之要對外尤其是美國開放利益。
為G8峯會搵談判籌碼？
在職能上世界銀行睇開窮國，而IMF睇開富國，但係大家還記得本月中G8財長峯會，有成員國如德國對各國狂泵水救市，擔心通脹可能出現失控，贊成減債退市措施，並考慮委託IMF研究退市策略。只是現時若退市，英美兩國自己知自己事，肯定頂唔順，但係IMF唔係由美國人揸旗，斷估佢哋惟有依靠自己話得事嘅世銀打開口牌，為全球經濟把脈，順便扮死狗幫個市降溫，為反對退市者於下月8號G8首腦峯會上提供多啲談判籌碼。
胡孟青