香港大學噚日頒發長期服務獎，表揚服務滿25或35年教職員，服務滿35年嘅教務長韋永庚最傳奇，佢被尊稱「韋老闆」，由殖民地時代到回歸後，先後同五個校長共事，親經港大兩次火警，00年民調風波鄭耀宗被拉落台，佢話係最難忘事件。
韋老闆噚日形容港大係一個開心大家庭，無論發生乜事，大家都希望和氣收場，八方見到好多人送可樂祝賀佢，以為佢係可樂精，點知係誤會，「我其實只係唔鍾意飲水同茶，其他甜嘅嘢都鍾意飲！」
另一35年老臣子、港大副校長周肇平家陣和藹可親，佢話自己以前係惡教授，學生懼怕佢「上堂都腳震。」佢話當年咁惡其實一片苦心，「諗住激發學生嘅潛能，但估唔到學生會咁驚我。」硬功唔得，後來佢用軟功，多鼓勵同關懷學生，「效果反而仲好！」
社會工作及社會行政學系講座教授周永新打港大工四分一世紀，佢話教出逾千名社工令佢引以為傲，佢又大讚港大高層堅守不干預學術自由傳統，令佢可放膽批評政府，冇擔心過飯碗不保。