八方深信，作為紀律部隊嘅入境事務處，今期壓力真係好大，佢哋要同高層抗爭，力保不減薪；又要幫香港把關，隔住豬流感帶菌者；仲要應付副局長粒聲唔出彈張卡片過來話要幫個女傭申請續期；另一任務，就係幫人民政府落閘，掟走所有受人民歡迎但唔受政府歡迎嘅人，咁多重大任務，真係ID精英都做到癲。
神婆Madam派傳道單張
八方有個朋友爆料，入境處呢輪真係做癲咗一位兩粒花嘅Madam。呢位Madam史詩式嘅病歷，可以從上年北京奧運前講起。據講，入境處一位Madam疑受上蒼呼喚，要佢無時無刻風雨無間咁傳道。於是有日，Madam熱心到喺口岸值勤期間，向入境旅客派發傳道單張，仲有夥計見到佢喺入境大堂同個外籍旅客企埋一齊合十祈禱，搞到班夥計O晒嘴標晒汗。
出入境e-道受歡迎，熱心傳道卻唔係人人受落，因此上頭將神婆Madam調遷到寫字樓工作，費事佢嚇親旅客影響香港形象，但係呢個只係Madam發圍嘅序幕，上年5月奧運火炬傳到香港當日，呢位Madam居然放下公務，走上街迎接聖火。
喺寫字樓工作嘅日子，神婆Madam未忘上天吩咐落嘅使命，據講佢每日返到office，基本上只係做一樣嘢，就係影印。影乜呢？唔係入境處宣傳防疫或者舉報偽證嘅單張，而係傳道嘅訊息。呢位Madam相當勤力，日影夜影，有時甚至會自願OT影印單張。
咁樣影法，搞到部門A4紙都唔夠用，有職員稱要開pettycash攞錢去出面買紙應急，其他同事冇佢咁神心，收埋叠A4紙，點知神婆神化到利用傳真機影印，方法就係將單張由一部傳真機fax去同office另一部傳真機，同影印有異曲同工之妙！
Madam返工唔着制服，又怕吹冷氣，返到office會大開門窗，夏日炎炎其他同袍要陪佢焗桑拿，佢又唔用電腦，指電腦有邪靈附體。八方老友話，呢位Madam嘅神並非時時顯靈，一有高層巡場，Madam就會回復正常狀態。
mailto:[email protected]