金融海嘯已經持續10個月，全球經濟衰退仲未走出谷底，各國政府仲好努力泵水救市。以色列女首富莎麗阿里森（ShariArison）（圖）近日接受訪問，竟然話自己有預知未來能力，仲早喺兩年前已預見金融海嘯喎。既然咁醒，點解佢唔早啲提醒大家？
富豪榜排名234位
據美國財經雜誌《福布斯》資料，佢擁有身家27億美金，約211億港銀，全球富豪榜排名234位。10年前佢繼承郵輪大王老竇TedArison大筆遺產，現時係Arison集團主席，持有以色列第二大銀行Hapoalim控股權，仲控制全國最大建築公司HousingandConstruction。
上個禮拜六，莎麗接受以色列電視台訪問，話自己可以直接收到「上天訊息」，能預知未來，仲巴閉到話早喺兩年前已預知會發生金融海嘯，家陣經濟危機仲未過，大家仲身處漆黑中，未有耐見光明。咁究竟危機會持續幾耐？佢話上天仲未有「訊息」喎。
究竟呢位富豪女先知有幾靈驗，華華無從得知，但係咁啱呢次訪問，係喺佢本新書今個禮拜發表時出街，唔知佢有冇預知佢本書會賣幾多本呢呵。