暫定今年第四季開檔嘅香港商品交易所，主席張震遠（圖）噚日自爆17人組成嘅董事會名單，但只限7位獨立非執行董事（獨董），包括港鐵（066）主席錢果豐、人行貨幣政策委員會委員樊綱、厚樸基金副主席何潮輝、深圳發展銀行監委會主席康典、大摩亞洲前主席莫理循、港大副校長王于漸，及港交所（388）前獨董陸恭蕙。
發展空間大
港交所本周五將公佈碳排放權產品諮詢，張震遠話睇中陸恭蕙近20年商品經驗，但對方一早辭去港交所董事，所以邀請佢加盟唔算挖角。
商交所另設3位執董，7位由股東出任嘅非執董，張震遠揚言力撐嘅政府冇份。佢仲話，股東同ATS牌照已七七八八，7月起招收交易會員，年底前以黃金同銀嘅期貨先打頭炮，實物或現金交收均可，黃金首個交收地暫定香港機場金庫，第二個或設於內地。
佢話，喺香港嘅中外投資者現時未能以實物嘅「香港金」對冲風險，港交所滿足唔到市場需求，商交所正好有得發展，儘管黃金實物交收一般只佔總成交不足1%。