喺呢個注重汽車豪華裝備嘅年代，數碼音響、GPS導航等可謂要乜有乜，惟獨欠一部電視！可惜一直以來市面上大部份接收器表現都差強人意。不過聽講最近又有新嘅車用機頂盒推出，梗係急不及待，搵嚟呢個最新產品，再加另一個人氣之選嚟一次實試。結果發現，想高清啲，除咗接收力，所在地區一樣重要。
記者：許維雅
攝影：伍慶泉
Model：Joey
汽車提供：富利堡（28776700）
試畀你睇
比拼對手
EIGHTCC-802機頂盒$2,280
Alpha1080pro機頂盒$1,998
步驟
1.測試時，我哋棄用原裝天線，換上EIGHT天線貼喺擋風玻璃窗頂部。
2.為確保兩個機頂盒接收來自同源頭，插上放大器之後，利用分插同時輸出訊號。
測試路線：起點係將軍澳工業邨，途經觀塘、東區走廊，終點站天后。
1.將軍澳工業邨 穩定有盲點
因為地方空曠，高建築物亦唔多，可輕易接收訊號，結果兩部都收得好穩定，不過間中都遇上幾個盲點。
2.將軍澳隧道 全軍覆沒
順理成章兩部都無嘢睇，無驚喜。不過EIGHT會顯示「無信號」提示，等你唔好誤會佢壞咗或者熄咗。
3.觀塘工業區 接收欠佳
出隧道進入觀塘區，EIGHT已經好快接收到訊號出現畫面，而Alpha就無乜反應。但一轉入工廠區，就齊齊無畫面，因為大廈密度太高。
4.港島區 表現不濟
出東隧上東區走廊，EIGHT畫面尚算穩定，而Alpha由出隧道開始就無晒反應。但落到天后，兩部表現都麻麻，只係間中有畫面，轉入大坑，惟獨EIGHT再次有訊號。
結果分析
緩衝長較穩定
睇表現，明顯係EIGHT大勝，全程約六至七成嘅時間可以收睇，而Alpha就只得約三成時間接收得到，喺港島區嘅表現尤其不濟。亦有啲情況係兩個接收器同時無用武之地，就係高樓大廈之間及隧道內。而且目前嘅發射站都係針對住宅區為主，所以一入到觀塘工業區都係收唔到。
不過EIGHT就明顯出現TimeDelay，但呢個原來唔係壞事。其實機頂盒嘅接收情況以往一直唔理想，全因香港建築物太過密集。唔同解碼器喺接收訊號時，大家嘅解碼分析都唔同，有啲可能需要訊號強啲先可以解碼。若然接收度有100%，當然大家嘅表現都無乜分別，不過EIGHT呢個CC-802機頂盒解碼分析度甚高，接收效果尚算理想之餘，緩衝時間又夠長，統計數據時比較穩陣，即使收唔到都唔會即刻無畫面。
裝電視 你要知
1.電視盡量唔好裝喺前排，司機行車時睇電視屬於犯法，會被檢控。
2.一般機頂盒喺九龍區接收較好，如旺角及尖沙嘴，通常出入港島區嘅，我就勸大家不如等啲發射站成熟少少先裝。
3.根據政府網頁資料，目前全港有7個發射站，想接收得好，就盡量朝着發射站嘅方向經大街行，避免行小路。
網址： http://www.digitaltv.gov.hk
4.換上品質較好嘅天線，最好加埋一個放大器，畫面表現會更穩定。
5.雖然無高清輸出，插三條AV線就用得，但一般安裝高清機頂盒都要另收安裝費，費用多少則視乎汽車型號及品牌而定。
查詢：豐旭貿易（31884362）