夏天一到，市面上亦推出了多款聲稱可以瘦面瘦身嘅Rollers，全部都係靠RollingMotion去碌走脂肪，價錢亦唔平。為咗個個都有得試，記者巡勻花園街，發現呢度$50就可以任揀三款，碌身碌面碌埋眼都得，任你碌走全身脂肪！平平哋買幾款返屋企日日碌，當做Massage都抵。
全身碌到瘦
其實Rollers真係幾有用，因為原理係刺激血液循環，令底層細胞更活躍，就算平日唔得閒做運動，但日日勤力碌都應該有效嘅！花園檔口就有賣多款唔同部位嘅Rollers，老闆娘向記者重點推介最新3D三方位瘦面Roller同胸部提升BustRoller，唔知掂唔掂？可以即場試過先至買，好玩之餘又實用，你睇中邊款呢？
幫頭髮扮靚靚
檔口除了消脂轆之外，更有大量方便嘅美髮產品，最啱香港女仔。成日趕時間出門，買幾樣法寶輔助器看門口就最Perfect！記者推介直髮梳，一路吹頭一路梳，唔使用直髮夾都夠晒直！另外，梳公主頭用的拱形梳都好有用，適合頭髮較少但又想有Volume效果的你。只要將前髮梳後，再將拱形梳放入前髮內便可，十分易用！
變臉好幫手
唔使整容都想有變臉效果，可以用單變雙眼皮夾。老闆娘話只要每日夾五分鐘，好快就會由單變雙，唔使去割咁大陣仗！想鼻高都可以用鼻夾每日夾吓，等鼻樑有番個形，最緊要係十零廿蚊有交易，就算最終唔掂玩過都抵！
*以上貨品單買$20，買夠三款$50。
順便做埋美甲
近年有行開花園街嘅，都會留意到呢度有埋美甲服務，仲有好多人幫襯，價錢當然比起出面街舖仲要平，只係睇你敢唔敢喺街邊整甲啫！悅麗修甲只是$50、修腳甲$80、Gel手甲$258包閃粉、延長和50粒閃石等，材料齊全，平過好多樓上美甲店。
店名：大女人（ http://www.y-y-y-y.com）
花園街131號舖對面
店名：悅麗美甲（60856158）
花園街147號舖對面
