台灣富豪郭台銘（圖）近日好似黃飛鴻師傅上身，出席名下永齡慈善基金會創辦嘅永齡希望小學首次畢業禮時大拋書包，振振有詞勉勵班小學生，「將相本無種，男兒當自強」，做人最緊要「人窮志不窮」，日後先可以好似佢咁做董事長。
郭總喺畢業禮上勉勵學生，話「窮」唔係失敗嘅藉口，千祈唔可以失去志氣，反而要更加發奮，努力向上，仲搵自己做例子，話自己唔係含住金鎖匙出生，都係靠努力先至有今日嘅成就。佢仲話，只要肯努力讀書，日後都會好似佢一樣，做到董事長。
郭總呢番肺腑之言，唔知班小學生收到幾多，日後會有幾多個做到董事長。其實，書中豈止有黃金屋，仲有顏如玉，唔係郭總又點會再娶到個好老婆曾馨瑩，仲老來再得個寶貝女呢。