金融海嘯去年底來勢洶洶，嚇到煲呔藥石亂投，匆匆另起爐灶成立經濟機遇委員會，各界一致指呢個係「吹水會」，事關經濟機遇唔係高官闊佬坐埋一齊吹吹水就出現，若然如此，維園阿伯個個都變李嘉誠啦！
噴咗8個月口水，煲呔噚日宣佈經機會完成歷史任務，正式解散，慳番大家啲口水，功德無量。煲呔舊年指經機會有三大任務，分別係穩金融、撐企業、保就業，埋單計數，交唔交到貨呢？過去幾個月股市回升，有人仲話牛市重臨，係咪政府發功，大家心知肚明，所謂穩金融無疑係官僚一廂情願想法，以為可以救市真係太儍太天真。
煲呔表明唔會翻啅
經機會非官方成員都係大公司高層、老闆，佢哋一方面開會研究保就業，另一方面卻手起刀落裁員不手軟，滙豐、渣打、利豐、畢馬威、中原等輪流炒人，經機會原來係炒人會，撐企業、保就業口號講就漂亮，做就醜陋。
不過最大嘅笑話，應該係呢個由特首領導，雲集商界猛人嘅經機會，千錘百煉提出嘅經濟機遇竟然係宣佈香港政府日後唔再用鎢絲燈膽，一律改用環保慳電膽！咁嘅建議都可以提出，你話經機會係咪對香港未來經濟發展貢獻良多呢。可惜，煲呔唔延長經機會任期，表明工作已告一段落，有人問佢會否翻啅，佢話：「冇咁嘅需要，佢哋嘅工作已經去到圓滿嘅階段。」
經機會帶領香港再出發，成員都依依不捨，施永青好似未夠喉，話根本唔知道噚日會後就收工，又話自己好多高見都未獲政府採納，佢懶理外間評價，「我理鬼佢咩評價，我行我素咋嘛。」至於經機會有冇用，施老闆睇得好化，「有冇用你哋講啦，我無所謂。」
紀律部隊輪流上街，噚日有記者問煲呔是否有管治危機，新聞統籌專員何安達初時擋住，但煲呔最後都要面對，但表現不耐煩，「我知嘞，我聽到嘞、我聽到嘞，唔使再問嘞，返嚟都係問番呢樣嘢。」記者會仲有花絮，臨開始時有記者電話響，煲呔即時喝停，「等一陣，我等嗰位小姐打完電話先。」之後再問個記者，「小姐，你轉咗震機未呀？」
mailto:[email protected]