市道唔好，公益金08/09年度只籌得1.98億元，比07/08年少咗6,000幾萬。公益金籌募委員會聯會主席余錦基話，上年籌錢好辛苦，但明白市民受金融海嘯威脅，捐款少不免會手緊啲，不過佢強調公益金一向量入而出，截至今年3月底有逾4.3億元儲備，財政狀況絕對健康。
昂船洲大橋百萬行
低處未算低，余錦基預計今年只籌得1.8億善款，重回03/04年度沙士時水平，「喺咁嘅環境，點都要保守啲。」驚唔驚連1.8億都籌唔到呢？佢拍晒心口話無問題，事關公益金獲中華總商會贊助，9月底舉行國慶60周年紀念百萬行，最保守估計都可以籌到逾千萬元。
另外，公益金百萬行明年會搞搞新意思，暫定會在新落成嘅八號幹線舉行，參加者有機會踏足橫跨藍巴勒海峽嘅昂船洲大橋。呢條橋仍未通車，做善事可以踏足橋面欣賞美景，相信幾有吸引力。青少年濫藥問題嚴重，余錦基話公益金日後或多撥資源予戒毒機構，幫助年輕人遠離毒海。