意大利洲際盃分組玩完，歸根究柢都係條防線輸得肉酸，輸0:3畀巴西，條數真係啱啱好。睇番條防線，中堅基亞連尼、簡拿華路、門將保方都係祖雲達斯嘅成員；加埋傳聞即將加盟嘅左閘杜辛拿，意軍5人防線竟有4人係「斑馬兵團」代表，我求大俠真係替祖記「粉絲」擔心。
大簡包越位靠唔住
呢場波對大簡嚟講好有意義，因佢今場平咗馬甸尼代表意大利上陣嘅126場紀錄。不過老天爺似乎唔太like佢，失第一球波，就係大簡包晒越位俾路爾斯法比安奴射入。意大利歷史上出名守力好，但係對住巴西失夠3粒，條防線真係靠唔住。門將保方即使被譽為全球最佳門將之一，但佢今場都冇晒符；簡拿華路今夏就會重返祖記，35歲嘅佢仲幫唔幫到「斑馬兵團」，簡直係一條IQ題。至於杜辛拿又話好快會由利物浦，以600萬鎊（約7,600萬鎊）轉投祖記，屆時連埋基亞連尼，呢條防線咪直頭同意大利好鬼相似？
準斑馬杜辛拿擺老烏
唉！大家睇吓對巴西場波，杜辛拿打到成隻左翼咁，失第3球又係輸佢擺烏龍；假如杜辛拿真係過檔祖記，咁嘅防線組合都咪話唔驚。我求大俠身邊都有好多「斑馬兵團」嘅「粉絲」，佢哋都話大簡、美爾保同杜辛拿喺度都冇乜用，淨係留住保方同基亞連尼已夠。睇嚟祖記新帥費拉拿睇完今場意、巴直播，可能經已勸咗管理層唔好簽杜辛拿喇！
大簡回晒塘係事實，假如2010年世盃仲係由佢做隊長，意軍躉唔知仲有冇信心呢？大簡賽後話：「出局都冇計啦！我哋嚟到南非諗住做少少嘢，同埋畀啲新仔攞啲經驗囉！」言下之意，你好似有啲賴皮喎大簡。前鋒東尼就話一定要變：「咁樣落去唔係辦法，世盃決賽周前一定要調整。」