iPhone3G推出未足一年，新版iPhone3GS今日又殺抵旺角先達機場；雖然此機極受蘋果迷關注，但從先達各大小舖頭可見，再無出現上一代3G推出時嘅熱情，甚至見唔到有訂機招徠，以iPhone系列嚟講，呢個情況可算甚少見；32GB版3GS賣價約為八、九千，而16GB約七、八千，話明冇實價、睇走勢，價格可升可跌！
記者：許福合
攝影：陳陶鈞
Model：Mandy@PureModels
水機未解鎖
有留意iPhone3GS消息，都知美國在6月19日率先開賣！而香港行貨將於7月9日推出，所以水貨都係「美國版」；暫時的報價尚算合理，與當年iPhone3G推出之時炒價相近。不過美國版3GS都有鎖機問題，現場實試插張3仔SIM，完全收唔到訊號；據知解鎖需時，可能需要兩三日，甚或一星期，預計解鎖費用約數百到一千。
買iPhone當然想拎去威，但最弊3GS同舊機3G幾乎難以分辨，無論機身外形、重量都分別不大，唯一分別就係3GS有32GB版，而機背嘅印字比較之下，會略為反光，而跟機配件亦一樣，但要留意水機會跟兩腳插頭。3G機用家對換機衝動不大，但對未有iPhone用家，3GS會更吸引，事關以往好多用家投訴慢、記憶體不足的問題，3GS都有明顯改善，例如連續開數個軟件，都未見有遲滯嘅情況，3GS多個S代表Speed果然有原因㗎！
新影相拍片
iPhone3.0軟件已經推出，好多3G機用家已經升級使用，不過3GS貴為新機，自然有獨有功能，以下幾個就係3GS最吸引功能。
300萬像素拍照
舊版3G為200萬像素，而3GS會升級至300萬像素；基本圖示、操作無變動，但就多咗自動對焦白色框，影相時會較容易掌握對焦位；實地試玩CloseUp自拍，真係有前後景深感覺，而且對焦位幾準確，唔係得個樣㗎！
VGA拍片
3GS速度提升後，亦可應付拍片需要；拍片同影相整合在同一介面內，按下相機功能後，右下角會見到相機同攝錄圖示，當拉去右邊轉換成攝錄模式後，中間嘅相機鍵就會換成代表錄影嘅紅鍵，按下就會開始攝錄，質素為VGA（640×480@30fps），錄影長度就睇剩餘容量喇。拍完嘅片仲可以做簡單Edit，揀選影片後，會見到畫面上有一條「影片」，Click上去可以拉動修改影片開始同結束時間，完成後按右上角「Trim」可儲存成新檔。
新功能
VoiceControl
聲音控制係3GS先玩到嘅新功能，可以利用聲音來打電話、揀歌等，而支援語言包括英文、國語、日語等，廣東話？唔受你玩。
數碼指南針
3GS其中一個新圖示就係指南針，利用GPS、Wi-Fi及網絡商提供資料，可以顯示機頂指向嘅方向，這個指南針再配GoogleMaps，就唔使再怕迷路啦。
語音備忘錄
語音備忘錄屬iPhone3.0提供嘅功能，3GS同3G都同樣玩到，主要提供即場錄音，使用方法簡單；有咩事錄音記錄就唔使慢慢篤字。
複製及貼上
可能係iPhone3.0最重要新功能，複製及貼上終於出現在iPhone上（兩代機都可使用），當按下文字或圖片1-2秒，就會出現Cut、Copy選項，複製範圍亦可修改。
查詢：G.World（23966380）
地址：旺角先達廣場1樓F56舖
