所謂唔聲唔聲嚇你一驚，平時睇落文質彬彬嘅唱作人張繼聰，原來周身肌肉好鬼大隻。前日父親節，唔見佢同老婆謝安琪抱囝囝張瞻出街慶祝，只見佢一個人喺大埔比華利山寓所附近跑步，聽緊iPod嘅張繼聰赤膊上陣，露出結實嘅胸肌同腹肌。
張繼聰本來好有型咁邊跑步邊聽歌，又不時望吓右手手臂嘅紋身，點知突然有隻狗喺路邊撲出嚟，嚇到佢成個彈開，之後佢見隻狗冇追住嚟，先至掉番轉頭繼續跑步，前後跑咗20分鐘就返屋企休息。
另外，張繼聰噚日出席電台活動後，再到九龍灣做皮鞋專門店Clarks嘅剪綵嘉賓，客戶仲送鞋畀佢同屋企人，張繼聰話呢個時勢有錢賺又有着數都算幸運，佢話：「我係好抵用，主持都可以做埋，又識搞氣氛，直頭收得太平，一個人頂幾份，我呢啲叫麻甩模，唔及模靚。」
謝安琪讚老公健康
張太謝安琪噚日就去咗蘭桂坊，宣佈成為屈臣氏代言人，其間佢幫男fans敷面膜，問佢平時會唔會幫老公敷面膜？佢話唔使，因為阿聰注重健康叻過佢，平時喺屋企練詠春打木樁養生，其實佢講漏咗，佢老公亦都好鍾意跑步健身㖭！