教育局局長孫明揚同政制及內地事務局局長林瑞麟，共通點除咗外號有個「公」字之外，仲有一個同病相憐嘅情況，就係民望長期處於下游位置，往往只可以引用煲呔名句「民望如浮雲」自我安慰。查實市民唔多like呢兩位公公，好明顯因為佢兩位都係「人肉錄音機」，孫公噚日都直認政改問題拖累佢民望低沉，唔知林公公又點睇？
做第一代人肉錄音機
孫公官場打滾幾十年，堪稱政界老油條，奈何撈咁多年都撈唔起，民望一向偏低。佢噚日接受電台訪問時真情剖白，話市民唔多鍾意佢，皆因佢曾經主理過最棘手嘅政改問題，講嘢成日模稜兩可。
確實孫公同政制又幾有緣。89年佢做過憲制事務司，97回歸後又出任政制事務局局長，回歸前後都被政府委以重任搞政改。孫公都乘機大吐苦水，話官員好多時唔可以就政制問題表態，尤其當年中英談判未有共識之前，政制係超敏感話題，講又死、唔講又死，惟有發表啲模稜兩可嘅意見，被人問N次都係repeat又repeat，堪稱第一代人肉錄音機。
由於講咗等於冇講，市民點會唔覺得你遊花園？孫公自知無法改變市民印象，惟有樂觀接受民望低呢個事實。好彩人稱孫公嘅佢真係做咗公公，見到3歲同4歲嘅孫仔即刻開心番，仲將屋企變為孫家飯堂，成日call孫仔返嚟開飯共敍天倫。
退休研究賽馬必贏術
兩、三年後就會退休唔使再為浮雲煩惱嘅孫公，噚日已經諗到退休大計，就係專心研究賽馬必贏術，唔知到時會唔會出書授徒？原來今個星期三係孫公同太太結婚41周年紀念，佢話未敢忘記，否則會引起「嚴重」家庭糾紛。
雖然係第一代人肉錄音機，但孫公現時人氣唔夠林公公咁勁，事關佢早排訪問台灣時，成功將港產人肉錄音機揚名台灣新聞界。近日有網友又將一段林公公喺立法會開會時釣魚嘅短片上載互聯網（ http://www.youtube.com/watch?v=uY0m7JDvX1s），炮轟林公公浪費納稅人每月30萬蚊「人肉錄音機維修費」。呢條片至今已有近5 ,000次點擊，睇嚟民望插水，除咗關乎講嘢有冇料到，頂唔頂到眼瞓都好重要。
mailto:[email protected]