近年唔少藝人名人傳出整容新聞，雖然有晒相睇到「變臉」前後嘅分別，不過大多數人打死都唔會認。前晚日本潮服店喺銅鑼灣搞個派對，寇鴻萍大女唐貝詩同性感靚女椋名凜都有出席。
唐貝詩同味之天使「藍莓」劉俐一齊到場，現場唔少人都覺得唐貝詩個鼻高咗又靚咗，但係佢一見傳媒即刻好避忌，只係企咗幾秒鐘影相就急急腳入場。問唐貝詩係咪整咗個鼻？佢一聲不響就鬆人，佢朋友幫佢解畫話佢唔舒服所以唔講嘢喎！
椋名凜性感冇底線
椋名凜被指扮有錢住六本木，佢經朋友繙譯話：「住六本木係我鍾意，同細佬住，我冇話我有錢，我係出身小康之家。」佢仲話如果劇本適合，唔介意冇底線嘅性感演出。而近來好惹是非嘅諸葛梓岐被傳收8,000蚊搶周秀娜工作，佢大發嬌嗲話：「我唔講幾多錢，總之唔係呢個價錢。」
至於Ball場常客馬清偉同女朋友一齊出現，講到前妻薛芷倫（Fanny）早排個嘴突然變厚咗，惹嚟整容疑雲，馬清偉話：「我有同佢見面，人大咗味道唔同咗啫，我唔覺佢唔同咗樣。」問到Fanny係咪好多男朋友，馬清偉笑笑口話：「佢咁靚女，應該多。」
