07年股市水漲船高，內地大型企業賺到盤滿缽滿，董事長、首席執行官等高級管理層人工即時飆升，其中平安保險（2318）董事長兼首席執行官馬明哲6600萬人民幣嘅天價年薪，惹來各方猛烈抨擊。無論股民定係網民都深感不滿，唔知係咪因為嘈得太勁，今年6月10日，國務院常務會議通過國有企業高管年薪規範，但平保完全唔受影響。
不是國家控股只是參股
《經濟觀察報》報道，國有企業高管年薪規範，預期會喺今年7至8月期間頒佈兼執行，消息話，高管薪酬限制只適用於中石油（857）嗰類國有獨資或者國家控股嘅企業，所有「國有參股」企業都唔喺限制之列，換言之，以滙豐為大股東嘅平保，高管薪酬唔會受到限制。
雖然唔受限制，不過馬董早着先機，一早表明，為咗同班員工共度時艱，佢08年唔要人工，兼且一蚊花紅都唔收。