卡通版《變形金剛》兩大主角柯柏文同麥加登，明明幾圓滑幾靚仔，居然去到電影變成鋼筋暴現，證明設計得太真實未必討好；但無論如何，呢套每秒CG都係燒錢嘅大片全球賣座，續集加埋IMAX特效，肯定正到飛起！趁電影24號先上，不如操定隻預先「上畫」嘅新Game，過吓癮！
文：陳福榮
博狂兩派揀任務
睇得《變形金剛》，唔會個個鍾情人類老友嘅博派，點都有班死硬派係偏好壞事做盡嘅「狂迷」，因此遊戲可任玩家揀角度去演繹故事，完全跟足上集個Form來做。
兩條路線加埋共25關，相信機迷們唔會玩完一邊就算，點都掃晒所有劇情去享受所有增設部份，而且佢唔再係單線式劇情發展，無論博、狂兩派都任你揀任務去做，只要完成特定條件即能進入接住部份。
套戲有嘅主要場景如空母海戰、大街混戰等全數保留，留意雖然佢自稱是第三身視點射擊玩法，但近距離大招先有較佳命中率與破壞力，唔怪得連大黃蜂都下下跳劈咁打啦！
機體比電影版更多
如果仲係得上集嗰堆機種，莫講入場觀眾會爆粗，機迷都唔會放過佢！據知隻Game收錄咗29款機體，博派俾狂派少3部，而且某啲機種只能喺多人連線時先用到。
當然，為提高遊戲嘅耐玩性，開發小組仲專登整啲電影版冇嘅原創機俾大家揀，好似有識得分離嘅博派戰機，但戲內就肯定並非要角，甚至根本冇佢存在，仲有網戰專用嘅尋找者等，保證《變2》迷唔會嗌唔夠喉。
連線比拼玩法多
本作共有5種連線玩法，包括有任揀機體嘅群揪、博狂兩派對決嘅組隊模式、類似《星戰Battlefront》爭地盤兼賺分嘅控制領地、針對敵方首領來殺嘅獨一無二小組戰，同埋好多FPS都備有嘅搶軍旗。
或者有人會質疑，上集出得麻麻哋，對今集信心大減，但《變2》由實力派Luxoflux去搞，過往佢哋出過電影改篇作品如《功夫熊貓》和《史力加2》等，仲有幾好評嘅犯罪Game《TrueCrime》，都算係唔錯作品。而除咗360同PS3版外，《變2》仲會出喺Wii、PS2、PSP和DS，最特別係DS因佢會分為博狂派兩個不同版本，想玩齊全部版面就要畀多次錢咯。
Profile
機種：XB360、PS3、PC
開發：Activision/Luxoflux
類型：動作
價格：約$340
