一句「北極人少企鵝多」響朵嘅民建聯副主席張國鈞，噚日現身幫競逐灣仔鵝頸區區議會補選嘅黨友「灣仔薛家燕」鍾嘉敏拉票，但現場只見企鵝男行行企企，唔係好覺佢有出手拉票。
辯解一大籮
有人問佢發表「企鵝論」後仲蒲頭，驚唔驚影響民記選情，佢就好輕鬆話兩者冇乜關係，「因為今次唔係我做候選人」。
企鵝男又解釋，當日發表企鵝論其實有好多原因，包括：啱啱去完民記路向營、嗰排好忙好多嘢做、個港台節目要一連錄兩集，同埋想講稿生動一啲，所以雖然已經寫好稿，最終忍唔住爆肚，「我諗住講北極，但覺得悶悶哋，決定加個形容詞，錄嗰陣就咁講咗」。
企鵝男話節目出街後，港台6點鐘打電話同佢講「唔好意思」，話港台經過幾重審查後，完全唔覺佢言論有問題。至於呢期鍾意事先睇片嘅台長麒叔有冇睇過，港台就冇提。
對港台事後為佢「企鵝多」三隻字消音，企鵝男話呢個唔係佢要求，又話當日唔少好友同佢講，其實北極係有過大企鵝，「不過已被過度獵殺家冇晒咯」。