有報道指，謝國忠從私人渠道獲悉，恒生指數從10000點到15000點是歐美機構拉動，而從15000點到19000點是由內地資金拉動，仲話啲錢流入埋樓市，相信大部份人會同意，因為路人皆見，只怕19000點之上又再由香港股市點心一族來拉動！
資金又再流入
上星期五晚金管局於紐約時段又再出動，接咗2億美元沽盤，當中有說來自歐美對冲基金，有說來自內地資金曲線流入，有說大摩亞太區指數有把中國股市比重上調，又或者我哋諗得太多，人家只係到此一遊抽新股，總之就係想明刀明槍話你知個市仲未炒完，惟有跟着市場走。
上周恒指自2月26日以來首度連跌4個交易日，全周跌5.13%，上證指數卻升4.98%，兩地股市走勢出現明顯分化，未必代表內地資金走咗返去炒IPO，不過內地股市上升終於被認同為屬於一種承受得起IPO重啟的利好訊號。
而率先炒起港股嘅資金唔係來自內地而係來自歐美，「新興市場之父」麥樸思3月時說牛市已重臨，早前又改口話真正牛市要等年底，追隨開呢支盲公竹嘅國際游資實行二仔底死跟唔出奇，反正大把盈利在手，隨時割禾青攞返筆本金不足為奇。
內地資金唔係第一個來，也未必會第一個走，反正香港大把中資股任炒。要察看中資錢流向，可以留意多一個指標，自今年4月以來增幅出現放緩趨勢之內地居民儲蓄存款，有內地銀行家把現時情況形容為自2007年A股牛市以來居民存款第二次大搬家，同期大量資金湧入股市，就是最佳明證。中港股市一脈相承。
銀行存款大搬家
資金要由銀行存款系統進入股市，基本上有三部曲，首先是存款活期化，即是定期存款減少，活期存款增加，然後是出現存款增幅放緩，第三步就是活期存款被轉賬劃撥至股票賬戶，進入股市，存款下降，或購買基金，銀行表外資金增加。最新統計數字顯示，內地新開A股賬戶以雙位數字激增，最新數字1849萬戶，交易賬戶佔A股賬戶比例則達到14.51%，從內地儲蓄存款數據變化與資金進入股市配合開戶數字軌迹，顯示股民手影無所遁形。
胡孟青