Lamborghini對一般人而言確係遙不可及，不過職業車手兼飄移高手James就時不時都有機會揸吓唔同種類嘅高性能汽車，高手對呢部LamborghiniGallardoLP560-4Spyder嘅評語係：「同上一代同款細排氣量LP560比，呢部好玩好多！」
記者：梁美甜
攝影：譚盈傑
小改款LP560-4Spyder外觀上與上一款相若，除頭尾燈、頭唇、雙出尾喉最易辨認出兩車嘅不同外，引擎亦調校過。5.2公升V10引擎配全鋁合金雙臂懸掛加4WDViscousTraction四驅系統，搭配六前速E-gear半自動波，最大馬力輸出高達560匹，極速更達324km/h，0-100km/h都只需3秒7，性能更勝從前。
忍唔住出手
「相信新車應該好易突破時速極限……」James睇住部車自言自語，問佢係唔係要試劈。「唔會，試車同劈車完全兩回事，只係職業病，好自然會咁諗啫……（繞住車身行咗一圈）新車真係靚過之前，線條靚，個頭燈仲靚，係LED，拍得住R8對眉燈，睇得到林寶除注重性能外，造型設計更貼近潮流。」甫上座，即見James左郁右郁，「新車座椅舒服啲，包得更好，咦？呢個R掣係咩……哦，原來係後泊鏡，好呀，加裝後泊鏡睇位易好多。（踩油）嘩！引擎聲都比之前更沉實好聽，不如……」好，試吓隻「牛」有幾狂吧！「呼——」我終於領略咩叫絕塵而去！
引擎聲由遠而近，一停車，James已急不及待道：「新車反應快好多，1、2、3波好順好大力，扭力好早就到，反應好靈敏。迫力皮唔似一般高性能跑車咁超級敏感，反而更易掌握。避震偏硬入彎好玩易操控，日用都得，但載太太或者會被嫌辛苦。」
首次揸牛牛
坦白講，自己都有唔少揸高性能超跑嘅經驗，但真係唔算易操控，而且車身大喺馬路行都幾有壓迫感，故素來對林寶都想當然地覺得難以駕馭，加上見過唔少慢速「遊街」Show-off例子，對「牛」不嬲唔算特別有好感。但睇見James手舞足蹈講唔停之餘，舉目之下更係一街都係對LP560-4Spyder嘅注視目光。終於被虛榮和好奇心征服，上車！車身感覺不若蓮花、拉利般低，反而似波子同Audi跑車般嘅感覺，幾舒服自在。摸一輪操控掣之後，試一試油門同Brake，係，油門敏感反應快，軚感強，感覺好直接。放膽慢駛一轉就直接駛出大路，好爆！輕觸油門部車已好有力地快放。開住篷氣流不若一般開篷車般吹到儍。關上篷快掟一輪，車廂係聽到引擎聲，但唔算嘈，而且車身穩定唔會彈跳到暈，竟然有日常跑車般操控易而舒適嘅感覺，對林寶真係大大改觀。最盞鬼係成世女，揸過拉利同林寶，羨慕死唔少男友人啦！
規格
引擎：5,204ccV10
馬力：560ps/8,000rpm
扭力：55.0kgm/6,500rpm
傳動：E-gear六前速半自動波
售價：$3,580,000起
查詢：LamborghiniHK（29006666）