今個夏天，注定要繼續睇基斯坦奴朗拿度（C朗）台戲！喺美國先搭上名媛ParisHilton「兩度春風」，然後到賭城包房拖兩女盤床大戰玩3P，情節好睇過戲。威過，玩完，諗住佢之後會低調啲，錯嘞，前日佢坐私人飛機返家鄉里斯本，一落機就揸靚車、之後高姿態揸自己品牌嘅袋行街購物，怕且佢啱啱喺荷李活聲色犬馬，感染晒浮誇作風，返歸都似做騷咁做。
坐私人飛機排場勁
上星期六中午，C朗大搖大擺坐私人飛機抵達里斯本國際機場，戴住副黑超嘅佢，拖住兩個行李篋，驟眼睇個樣比之前消瘦咗唔少，但削咗唔代表殘，佢隨即登上法拉利599GTB離開，排場十足，為呢齣《衣錦榮歸》揭開序幕。眼見咁多記者做佢跟班，唔乘機宣傳等幾時？佢之後飛車去自己間「CR7」服裝店，離開後又拎住印有「CR7」字樣嘅紙袋繼續四圍購物，以為佢「插水」博犯規叻，原來博宣傳仲叻，點到你唔服！
嫌呢齣真人騷唔夠喉？唔怕，同場加映佢將架黑色911擺上網拍賣，標價69,995鎊（約89萬港元）。對於呢部車，我求大俠以前玩facebook啲遊戲都擁有過，真車就諗都唔敢諗，但對C朗真係濕濕碎，多車到保時捷都玩厭，換車猶如換女伴。
C朗之後會去南部艾爾加維繼續唞暑，然後至返老家馬德拉島探親，距離7月8日喺皇家馬德里亮相仲有成3個禮拜，怕且呢段時間關於佢嘅新聞依然無日無之。由始至終，我求大俠都覺得C朗好適合去荷李活發展，日前佢終於承認，早在一年前幫曼聯贏歐聯冠軍後，已經打算離隊，言則佢之後多次真情對話，話想留效曼聯嘅大龍鳳，都係虛假，廢話。咁好演技，唔踢波撈拍戲肯定一樣掂過碌蔗。