紫金礦業（2899）董事長陳景河今個月12號透過上海交易所大宗交易平台，用每股9.15元（人民幣．下同）賣出2759.4萬股紫金A股，其中2100萬股係賣俾十名公司高層，不過一個屈尾十，公司監事鄭錦興喺接咗100萬股貨之後就辭職，搞到大家疑雲陣陣。內地就有傳媒打電話問陳總發生咗乜嘢事，佢就話，之所以賣2100萬股畀十個高層，係因為成日有機構投資者問，點解佢哋公司高層冇乜揸公司股票，係唔係對公司冇信心呀？
高層半年內唔會減持
陳總話，為咗對佢哋嘅建議作回應，咁賣咪賣囉，但係啲高層唔夠錢買，咁點算？佢話，呢啲高層係先問咗啲「小非」（持股量5%以下嘅非流通股東）借一兩日短錢，交易完成後，再向陳總借錢還番畀啲小非，而佢哋只須向陳總分期還款。陳總又話，鄭錦興辭職，係因為要上岸重返政府做官；而呢班高層唔會喺半年後就減持，否則做咁多嘢就冇咩意思喎。
傳聞有9蚊價格聯盟
至於點解係用9.15元賣股？點解H股6月12號只係賣7.22港銀，平咁多倒不如賣H股啦！佢就冇解釋，只強調冇枱底折讓呢回事。坊間有傳聞，紫金大股東同小非們有默契，大家要遵守9蚊價格聯盟，低過9蚊就唔賣；到上個禮拜五，佢哋A股股價撐住9.32元，唔通傳聞係真嘅。
李華華
mailto:[email protected]