大家今時今日睇數據去估轉勢時，一定要記得今次海嘯嘅源頭花旗國樓市，係由二戰以來第一次下跌而引起。即係所有由二戰之後嘅「前瞻性指標」，啲前瞻功能都可能冇效。
例如，上個禮拜五公佈嘅「持續領取失業救濟金人數」係喺21個禮拜來第一次跌。如果你覺得係好事兼轉勢訊號，咁就大錯特錯。
失業救濟金最長派26周
之前，持續領取失業救濟金人數下跌嘅原因，係因啲人開始搵到工，即經濟轉好。
不過今時今日數字跌，係因為花旗國福利制度唔會養人過世，政府平均最長只會派26個禮拜救濟金，用完即止。依家數字跌，係因啲人已開始到冇得再攞嘅階段。好事？轉勢？你諗你囉。
孫柏文有好幾個朋友細細個移民加拿大。佢哋當然帶咗香港小朋友最優良嘅習慣過去，就係炒炒賣賣。當年我就炒盈科數碼動力，而佢哋都有隻異曲同工嘅hightech、揩嘢泡沫股，就係北電Nortel。你唔知間嘢以前有幾勁嘅話，自己上網睇。
點解今日講北電？之前4月27日，《金手指》寫咗篇題為「電盈目標價：$0」嘅文，之後啲網友又喺度鬧「譁眾取寵！」「駁收視！」。
北電清盤 電盈股東好運
噚日，北電宣佈清盤，公司支解。祝電盈股東好運。
最後，繼「成龍、崖上的波兒」MTV推廣策略，成功引我抽一手霸王（1338）之後。又有另一廣告，成功運用互聯網文化去推產品，同令用戶清楚認知產品嘅特點。
咩廣告？就係古天樂賣Yokohama車胎嘅廣告。我原本仲估係泰文廣告，因為古天樂讀個廣告口號時話：「想杰撚，撚胎撚。」點知原來係普通話。
咁我當然想知究竟古天樂講過乜，所以就再睇。好彩有字幕，完來係「想節能，輪胎能。」
大家可能笑古天樂講普通話唔準，不過大家又要同時承認真係記得Yokohama有隻車胎係特別慳油。仲要已有人扮古天樂個廣告，不斷重複Yokohama想你知嘅訊息。搵古天樂拍呢個廣告嘅職員，升職加薪啦！
孫柏文
http://phatdat.blogspot.com