大市上周出現連升3個月後的一次較大幅調整，全周跌4升1，恒指下跌968點，由高位19161起計到低位17655，則跌咗1506點。大市急升數千點後調整係意料中事。大市調整約8%，股仔升得急，亦跌得快，個別跌幅已去到兩三成。
今次大升市，由資金推動，出現預期以外逾60%的大升幅，而50日線亦已升越250日線，出現黃金交叉，確認牛市重臨。升市中一樣有調整，可以玩波幅套利，但亦係低吸的好機會。
今次調整，大家都應該感覺到，市場冇明顯嘅派貨迹象，其實唔少散戶獲利同減磅嘅貨，大部份都俾大戶接去。大家不妨計一計，家吓手上嘅貨，比兩三個月前，係多咗？抑或少咗？
大戶收集對象以藍籌同中資股，特別係內銀同內房股為主，但後市看好（即使跌到16300先再上，都有力再創今年新高），目前頗多大大偏低的二三線股，升幅會更為可觀，亦係可以「博大堆」嘅對象。尋寶遊戲又再開始。
大市調整，個別股仔仍大強勢，早前推介過的利來控股（221）同冠華國際（539），上周五就創出今年新高，利來掃清0.62元，「嘜」收0.58元，升9.5仙；冠華最高見1.03元後回收1元，升3仙。
成交增加動力轉強
冠華4月底由0.49元起步，本月初高見0.92元後調整，近日升勢再起，且連續3日大成交，每日平均有1500萬股，動力大大轉強，以量度升幅計，短期上升目標為1.27元。5月初曾作推介，當時股價0.61元，睇1元，已達標，可繼續睇好。
再睇周線圖，去年10月開始，8個月內，走勢形成大圓底，頂部在1元水平，今次有大成交配合，一破位而上，中期上升大浪便確認，上升目標指向1.65元，預期升幅65%。
09年度（3月年結）的上半年，冠華盈利1.52億元，保守估計全年2.82億元，每股盈利27.5仙。完成供股後，每股NAV攤薄至2.57元，以中線目標價1.65元計，PE6倍，PB0.64倍，仲係好吸引。紡織工業係中國10大振興產業之一，今年盈利會更好。
郭兆誠