六月十三日星期六本欄寫「請教鄧爾邦」，當日早上睇到，大嗌一聲，因為立即發覺錯誤，私隱專員係吳斌，鄧爾邦係平機會主席。唉吔，若在美國會所吃飯，碰到吳斌，畀佢笑到暈都似。鎖你鎖你。
中環名人P請客，到香港會吃午飯；名人P介紹賓客之前，先申報自己曾入住「麥理浩夫人渡假村」，食過特敏福，醫生檢查過無事之後，先至夠膽請客。原來佢位千金自倫敦回來，發生咳嗽、發燒跡象，立即送瑪麗醫院檢查，竟成為「確診個案」，於是名人P與太太就要住「麥理浩」七日。名人P話居住環境尚算舒適，最煩係出入填表不絕，而填寫嘅資料全部相同，令人煩擾，名人P話：「thatisbureaucracyatitsbest」，眾人大笑。
主要嘉賓之中，有一位退休海軍上將，名人P問佢：「我哋似乎仍要稱呼你為Admiral？」上將笑笑口答：「我有一位三歲大嘅朋友，佢叫我做Animal！」左丁山咬緊一塊麪包，聽見幾乎連口裏麪包都噴出嚟，外國人不怕自嘲，呢位六十餘歲嘅海軍上將實在幽默！於是主人家名人P立即答：「做將軍相信要有animalinstinct先至可以下令開火開炮。」
晉餐之前，開玩笑兩分鐘，笑到胃口大開。上將話未來十年，國際關係之中，中美關係最重要，佢退休後，努力促進中美人士往來，希望大家多啲認識，免除文化上及政策上的誤會，上將對美國人之缺乏中國知識，引以為憂，於是名人P又根據《金融時報》及外電報導講一個故事：摩根史丹利亞洲主席羅奇最近應召回國到眾議院講述中國經濟現況，指出美國人恐怕中國人搶去美國人職位，中國貨霸佔美國市場，中國操控匯率等等指控，實無根據，只係美國人的誤解。眾議院主席佩洛西指住羅奇說：「你擁抱熊貓（Youareapandahugger）！」羅奇感到好無奈。之後羅奇飛往北京公幹，去到酒店check-in之後，上到套房，赫然見到一隻大熊貓（玩具）放在床上，趨前一看，熊貓上有一字條，寫上：Willyouhugme?我哋立即問：「邊個咁心水清兼有幽默感呀？」名人P話：「我唔知，呢個世界係好透明嘅！」