BB在母親體內孕育10個月才呱呱落地，孩子應與媽媽最親近，但遺傳因子很奇妙，從五官到性格，父親的影子卻處處可見。
柴九哥黎耀祥，與11歲的兒子正橋餅印一樣，他的演戲細胞也遺傳給囝囝，兩人最近更拍檔搵食；翩翩公子石修，有個同樣醉心演藝事業的乖仔陳宇琛，父子還將合作拍劇。面對面，像照鏡那樣。
最快樂當然是每天都對着，46歲的甄子丹打遍天下無敵手，與太太汪詩詩育有一女一子，湊成個「好」字，他覺得親子關係很重要，故很珍惜與子女相處的每分每秒。今日父親節，無論你幾多歲，都應在這天好好跟父親慶祝一下。父親節快樂。
撰文：比華利、何慧斯、楊潔雯、顏英儀
攝影：仇志德、陳志嵐、陳慧安
武爸爸甄子丹外剛內柔
甄子丹鏡頭前硬橋硬馬，但當面對家人，他卻是個廿四孝慈父，他與太太汪詩詩育有一女一子，對於這個「好」字組合，子丹認為是上天給他最好的禮物。今日是一年一度的父親節，子丹身在內地拍戲，未能與子女共度，他日前趁空檔返港與太太、岳父岳母和一對子女到山頂慶祝，三代同堂，非常熱鬧。
囡囡繪畫表達心意
甄子丹幼子甄濟嘉（James）只有1歲多，未懂向爸爸表達愛意，重任就由5歲多的胞姊甄濟如（Jasmine）代勞。物輕情義重，Jasmine利用餐廳提供的畫具，即席繪畫愛心圖畫送給爸爸做父親節禮物，十分可愛。Jasmine在畫紙上畫上幾個心心，然後再畫出爸爸的模樣，其間甄子丹看到他的肖像只有幾根頭髮，顯得啼笑皆非，問囡囡：「可唔可以畫爸爸多啲頭髮？」
當見到女兒充滿心心的畫作，甄子丹即笑不攏嘴。他表示陪着囡囡畫畫的情景，令他憶起電影《葉問》中一幕，他扮演的葉問顧着練功，未有抽空陪伴兒子作畫的劇情。他說：「我覺得親子關係好重要，平時我經常出埠工作，接觸子女嘅時間已經唔多，我好珍惜同佢哋相處嘅每分每秒。」
甄子丹不諱言早年與前妻雖育有一名兒子，但自離婚後，兒子由前妻撫養，父子關係比較疏離，他說：「我好後悔畀唔夠父愛佢，我哋家仲有見面，但唔夠close，直至再婚，再有子女，我先學識做爸爸。每當唔使開工喺屋企，我都會親自幫囝囝換尿片，為囡囡講故事，全部親力親為，所以同仔女嘅關係好近。」談到對子女的期望，甄子丹說：「只要佢哋健康長大，做個對社會有貢獻嘅人，我已經好安慰。」
甜爸爸黎耀祥鬼馬傳情
黎耀祥的兒子黎正橋已經11歲，最近還有機會夥拍爸爸為迪士尼．彼思的首部3D動畫《沖天救兵》配音，一向好戲的祥仔遺傳了不少演戲細胞給囝囝，兒子小時候斯文淡定，日漸長大性格變得較外向，在學校參加不少課外活動，更是一名游泳健將。正橋說話時表情豐富，動作多多，自然流露了父親的演藝細胞，今次兩父子首度合作，令祥仔對囝囝另眼相看。
自製禮物烏龍百出
祥仔因為《巾幗梟雄》人氣急升，兒子黎正橋也有機會配音賺零用錢。正橋日前陪伴爸爸和媽媽Julia到德福商場買禮物，之後到日本餐廳食套餐慶祝父親節，一家三口樂也融融。正橋十分孝順，夾餸給爸爸之餘，又餵他吃多款日式美食他開心。食飽飽之後，正橋更送上一個父親節之吻給爸爸，得祥仔開心到笑不攏嘴，簡直是甜到漏。
正橋被問到送甚麼禮物給爸爸，他故作神秘說：「我仲諗緊，不過以前我試過整張卡送畀爹哋，想靜雞雞放喺佢個櫃入面，點知我放錯咗喺媽咪個櫃度，我之後先知擺烏龍。又有一年，我喺電腦整咗張卡送畀爹哋，點知我send錯地址，又係之後先知。」
祥仔開心地說：「一家人最緊要係一餐飯，所以我好着重一家人要一齊食飯，亦好享受一家人一齊食飯嘅一段時間。平時拍嘢都好忙，難得一家人有時間一齊食飯，我會好好把握呢個機會，同個仔閒話家常，傾吓佢啲事，傾吓我啲事，等大家輕輕鬆鬆講吓自己啲事，我覺得呢個都係一個歸屬感。」
對於正橋來說，一餐晚飯，是一個跟父母溝通的好機會，他說：「我會同爹哋媽咪講吓學校、游水、其他同學，乜都講吓。」
囝囝成私人攝影師
祥仔認為教育下一代的方法跟以前大不同，他說：「家係要彼此溝通同關懷，彼此欣賞，有時都要投其所好，好似佢鍾意影相，我都會畀機會佢學，買咗器材畀佢，佢都識得回饋我，就係幫我影相，好多時佢就係我嘅私人攝影師，有時我拍外景同登台，佢都會幫我影相。」
場地提供：魚一丁刺身居酒屋
髮型：IvanLeeofHeadquarters
型爸爸石修人生導師
石修和兒子陳宇琛（Sam）今日父親節均要工作，作為父親，能與兒子建立一段深厚而互信的關係，相信並非一件容易的事，石修日前接受本報記者訪問時表示，與Sam雖是父子，但會如知心朋友般傾心事，阿Sam坦言父母都是他最好的傾訴對象，他說：「佢哋都係一樣，不過同媽咪多數係講感情事，佢會用女性角度幫我去分析，同爹哋就係講事業、男人嘢，可能大家做同一行，佢又曾經經歷過我家嘅事，所以好多嘢會問佢意見。」
「乜事都攞出嚟傾」
石修不諱言喜歡用討論方式解決問題，他說：「我哋好少會嗌交，可能我鍾意有乜嘢事都會攞出嚟傾，但唔係撩交嗌，咁做冇乜意思，所以只係會坐低冷靜去分析呢件事。」
談到父子間的難忘事，石修想了一會兒後笑說：「其實由佢出世開始，已經好開心，我覺得最緊要係大家相處得有意思，佢帶咗好多歡樂畀我，尤其係佢嘅童年，嗰陣佢得一個人，好需要一個玩伴，所以我成日扮細路同佢玩，直到13歲先至冇咁黐身。」阿Sam曾經因為太自我而碰過不少釘，他有感而發說：「人與人之間關係好難去處理，我好慶幸有機會入行親身去感受，有機會睇到係一件好事，起碼我可以學習得到。」
稍後這對摩登父子將會首次合作拍劇，雖然未知有否對手戲，不過石修已事先張揚不會留力，一定要逼兒子交戲，阿Sam一派淡定說：「我家唔會覺得有壓力，爹哋畀我自由發揮，反而我初出道嗰陣，爹哋真係好緊張，佢成日都會同我分析表現，又會錄低啲節目等我收工一齊研究，嗰陣自己又會有啲嬲，覺得做唔到佢嘅期望，不過家個人老咗，做落咗咪放鬆晒，所以家冇乜壓力。」
飾物提供：LLazy-BonezDesign
笑爸爸吳耀漢迫整蠱乖仔
人不可以貌相，吳耀漢形象搞笑親民，兒子卻外表酷爆，原來吳耀漢管教子女甚嚴，採取有錯必罰的方法。吳嘉龍坦言做演員後才知父親當年養家的辛苦，今年父親節特別向父親表達心意，送上HappyBeans盆栽，希望父親日日happy。
從影近40年的笑匠吳耀漢今年12月便70歲，13年前他為了子女而移民英國，今年他回流香港拍戲，他說：「我今年70歲，唔知仲有幾多時間，我覺得自己仲可以拍戲，做自己鍾意嘅事。」嘉龍繼承父親的衣鉢做演員，更父子兵上陣拍過4部電影，他說：「佢唔會教我做戲，有時會特登整蠱我，知我做得唔好特登NG，等我做好啲。」吳耀漢對管教子女的方法，與他的笑匠形象剛好相反，他對子女會有錯必罰，嘉龍說：「老竇好嚴格，同阿媽同一陣線，錯咗阿媽一定打，爹哋唔會出聲。」
養天竺鼠偷龍轉鳳
談到嘉龍的童年趣事，吳耀漢笑說：「佢8、9歲時我送咗一隻天竺鼠畀佢，點知第二日死咗，我怕佢放學返到屋企知道會喊，於是靜靜雞買過另一隻差唔多顏色、但身形就大一倍，跟住嘉龍返到屋企一見就問點解天竺鼠大得咁快？我問佢係咪餵得太多食物，之後佢冇再追問，真係好搞笑。」
鳴謝：中西花店（中環擺花街）
