印度貧民窟做背景，連陳啟泰都唔再做的遊戲節目，再加上是套攞獎戲，未睇之前真係會諗，會否過時、沉悶、投入唔到，好聽講句︰「太有深度唔啱香港人口味！」但事實對比一齊爭獎的好幾套劇情片，佢係最為節奏緊張明快的一套。睇完一定大讚，攞獎實至名歸。
記者︰陸俊雄
粵語配音過癮
今次《一百萬零一夜》DVD版和Blu-ray版都有粵語配音，就係想聽班小朋友的對白有幾鬼馬。當然因為口形無可能對，有人會覺得感覺怪怪，但我又覺得可接受，無聽錯的話全片好似無一句粗口對白。
要數一定要睇，當然係小澤牟跳入屎坑再衝入人群，要攞巨星阿密塔簽名那幕。小澤牟攞到簽名時仰天大叫未係最抵死，反而留意佢阿哥小沙林在人群中係咁死唔斷氣叫「我愛你」先過癮。
好歌連場
奧斯卡賽果中，《一百萬零一夜》連最佳配樂都攞埋，的確就算聽唔明佢啲印度話，都會覺得戲中好多首歌旋律好聽；影碟聲效播歌上完全無跳線，發揮正常，我就最鍾意首《PaperPlanes》，即是兩兄弟在火車頂那段配樂，在進入特別收錄介面時，一樣係用呢首歌。至於《JaiHo》更是出晒名，跳舞歌一首，節拍出色，公益金請三個小朋友來都係唱佢。
Bonus失望
其實好期望有多啲關於貧民窟的幕後花絮，事關就算做旅客亦都冇機會去到，可惜只係得導演訪問時，言語間提到貧民窟不如西方人起初所想；仲話印度本土拍戲多在戲棚入面，好少拍外景，所以在大街大巷拍戲時，好奇的居民係會企足一日圍觀你拍。
而且小演員的訪問亦欠奉，演大沙林的麥活米泰爾，說話又假又行貨，都係導演丹尼保爾滔滔不絕的表現，令人印象最深。
