肥版「民主女神」譚香文退黨後，公民黨「鬍鬚俠」張超雄亦另起爐灶，自任「社長」嘅正言匯社噚日開幕，轉戰將軍澳服務弱勢社群。
同譚香文不同，張超雄冇退黨，又強調冇諗過退黨或者轉會。噚日公民黨頭頭畀面出席，八方只係見唔到湯大狀啫，其他泛民成員都好齊人撐場，民主黨、社民連、職工盟、街工代表致辭時，都大讚張超雄關懷弱勢同佢哋幾個組織理念十分一致，郭家麒笑言既然如此，不如推舉鬍鬚俠做泛民「盟主」。
余志穩四両卸千斤
就快退休嘅社會福利署署長余志穩都有現身，有弱勢社群代表即場投訴，批評政府忽視殘障人士需要，搞到佢哋去正言匯社嘅會址都好困難。余志穩就話自己唔熟悉將軍澳，都花咗一番工夫先抵達正言，不過第二次就好快搵到，笑言萬大事有恒心就辦到，四両撥千斤輕輕卸責。
來賓眾多，張超雄話都不及18歲囡囡同太太支持，佢聽日會同近300個智障學生同家長包圍立法會，要求政府取消18歲智障學生要離校嘅政策。